68 sena żwieġ u l-imħabba ta' bejniethom għadha tikber
MaltaRightNow.com
23 ta' Novembru, 2009 09:24 CET Il-fidi hi parti essenzjali fiż-żwieġ tal-koppja Tabone, b'devozzjoni speċjali għal San Ġorġ Preca, li sar qaddis propju wara li t-tabib Ċensu Tabone ċċertifika l-fejqan bla spjegazzjoni ta' wieħed mill-pazjenti tiegħu...
Wara 68 sena żwieġ, l-imħabba li l-President emeritus Ċensu Tabone u martu Maria għandhom għal xulxin għadha evidenti daqs li kieku kienu għadhom miżżewġin friski. Maltarightnow.com tkellem mal-koppja Tabone fid-dar tagħhom f'San Ġiljan, fejn huma rrakkuntawlna kif iltaqgħu **** Maria, flimkien mal-familja tagħha, marret toqgħod xahar Għawdex minħabba li missierha, li kien Maġistrat, kellu jservi għal xi żmien fil-qrati ta' Għawdex. Iżda minħabba li kienet għadha żgħira, kellhom jgħaddu xi ħames snin qabel ma huma t-tnejn bdew jinnamraw bis-serjetà . Kien propju fit-23 ta' Novembru tal-1941, **** Ċensu u Maria żżewġu fil-Palazz tal-Isqof, Għawdex. Iżda Maria kienet ilha li tefgħet għajnejha fuqu minn mindu kellha ħmistax-il sena.
Il-ġurnata tat-tieġ tagħhom kienet waħda memorabbli, mhux biss għalihom, iżda wkoll għall-mistednin, bil-bombi tal-għadu bħal murtali waqt il-festin. Iżda, kif irrakkontatilna Maria, f'dak iż-żmien ta' diffikultajiet li kkawżat il-gwerra, il-mistednin kollha marru bi ħġarhom għar-riċeviment tat-tieġ - okkażjoni fejn għal darba kienu se jsibu ikel bl-abbundanza. B'nostalġija, il-koppja Tabone ftakru wkoll fil-honeymoon tagħhom, li huma qattgħu fil-lukanda Royal Lady. Iżda ma damux wisq igawdu lil xulxin għax l-għada, Ċensu, li kien tabib mal-militar, kellu jħalli lil martu warajh Għawdex għax waslitlu l-aħbar li l-armata Taljana kienet se tattakka lil Malta. Il-fidi hi parti essenzjali fiż-żwieġ tal-koppja Tabone, b'devozzjoni speċjali għal San Ġorġ Preca, li sar qaddis propju wara li t-tabib Ċensu Tabone ċċertifika l-fejqan bla spjegazzjoni ta' wieħed mill-pazjenti tiegħu. Iżda b'umiltà kbira, huwa qalilna li kien għamel biss dmiru ta' tabib. Fissrilna kif għadu sal-ġurnata tal-lum jitlob lil dan il-qaddis kuljum biex jgħin lilu u lill-familja tiegħu għax iħoss ruħu tant ixxurtjat li Alla tah tant affarijiet sbieħ f'ħajtu. Ċensu Tabone, li llum għandu 96 sena, qal li 'ż-żwieg hu kaxxa magħluqa', iżda b'vuċi emozzjonata stqarr illi, 'Kieku kelli nagħżilhom jien l-ingredjenti tal-kaxxa tiegħi, ma kont inbiddel xejn f'Maria!'
Il-ħajja tagħhom ma kinitx waħda faċli, kif spjegatilna Maria, ta' 89 sena. Hi u tirrakkonta kif, wara li kellhom tlett itfal, żewġha mar Londra biex jispeċjalizza fil-kura tal-għajnejn. Minħabba li dak iż-żmien kienu jikkomunikaw biss permezz tal-ittri, it-tnejn li huma ħassew ħafna n-nuqqas ta' xulxin. Għalhekk, **** wieħed mill-ġirien tagħhom offra lil Maria ċ-ċans biex iċċempel lil żewġha l-Ingilterra, hi ħatfitu fil-kelma. Iżda qabel irnexxielha tikseb in-numru tat-telefon ta' żewġha laħaq għadda ftit taż-żmien, u t-testijiet tat-telefonati internazzjonali kienu laħqu spiċċaw. B'hekk, Maria kellha tħallas lira u nofs biex iċċempel lil żewġha, somma sostanzjali ħafna fis-snin erbgħin. Iżda l-eċċitament tal-koppja tant kien kbir **** semgħu leħen xulxin wara sena u nofs ma jitkellmux, li ma felħux ilissnu kelma. Għalhekk, Maria kellha tirritorna l-għada u terġa' ċċempillu **** t-tnejn kienu kkalmaw. B'sens ta' umoriżmu kontinwu, il-ftit tal-ħin li qattajna magħhom kien biżżejjed biex nindunaw x'inhu s-sigriet taż-żwieġ feliċi tagħhom. Iżda Maria kompliet tiżvela li sa mill-bidu taż-żwieġ tagħhom huma ftehmu li qatt ma kienu se jorqdu miġġildin, u dan għen ħafna fir-relazzjoni tagħhom. Kif stqarr il-President Emeritus Ċensu Tabone, hu u martu ma jixbgħu qatt jirringrazzjaw lil Alla, għax, 'Qatt m'hu biżżejjed li nroddulu ħajr tal-ġid kollu li għamel magħna. Dik hi l-verità kollha...kif jista' jkun li kien ħaqqna li jberikna daqshekk b'din il-familja tant sabiħa u bi tmint itfal li jħobbuna daqshekk!'Â
Il-President Emeritus Ċensu Tabone, ta servizz twil fil-politika f'pajjiżna, u wara snin twal fil-Parlament bħala Deputat Nazzjonalista fejn serva anki bħala Ministru għall-gvernijiet Nazzjonalisti, serva wkoll fl-ogħla kariga ta' pajjiżna - dik ta' President tal-istat Malti - li temmet karriera twila fil-politika ta' servizz lill-poplu u lil pajjiżna.